Chalut mes gins !

Produit magique...

Chalut mes gins !

J’n’sais pon chi t’es com’ mi, mais j’sus toudis amusée quind j’ravise à l’tévé ches pubs pou ches produits d’nettoyage. Ch’est incroyape, cha ! Quind te vos l’état d’el cuisinière, de ches vécés et même du sol, t’as l’impréchion que ches louloutes (et ches loulous quéquefos) alles n’ont pon fait ch’ménache d’pis des lustres. Heureuss’mint, i y a un produit magique qui, sins frotter, i t’inlève toute cheule sal’té ! In pus, i est tell’mint intelligint qui sait tout faire ! Mi, ch’que j’treuve dommache ch’est qui nettoie pon tout seu l’baraque. T’imagines, ti ! In pos’te l’boutelle ouverte dins eune pièche. Te parts in balate et quind t’arviens, tout i est propre, du sol à plafond…